ਬਿਹਾਰ ਤੋਂ ਬਾਅਦ ਹੁਣ ਝਾਰਖੰਡ ’ਚ ਵੀ ਡਿੱਗਿਆ ਨਿਰਮਾਣ ਅਧੀਨ ਪੁਲ

ਝਾਰਖੰਡ – ਬਿਹਾਰ ਤੋਂ ਬਾਅਦ ਹੁਣ ਝਾਰਖੰਡ ’ਚ ਵੀ ਨਿਰਮਾਣ ਅਧੀਨ ਪੁਲ ਡਿੱਗ ਗਿਆ। ਗਿਰੀਡੀਹ ਜ਼ਿਲੇ ਦੇ ਦੇਵਰੀ ਬਲਾਕ ’ਚ ਅਰਗਾ ਨਦੀ ’ਤੇ ਬਣ ਰਹੇ ਪੁਲ ਦਾ ਪਿੱਲਰ ਭਾਰੀ ਮੀਂਹ ਕਾਰਨ ਡਿੱਗ ਗਿਆ, ਜਿਸ ਕਾਰਨ ਗਾਰਡਰ ਟੁੱਟ ਗਿਆ ਅਤੇ ਪੁਲ ਤਬਾਹ ਹੋ ਗਿਆ।
ਅਧਿਕਾਰੀ ਨੇ ਦੱਸਿਆ ਕਿ ਫਿਲਹਾਲ ਕਿਸੇ ਜਾਨੀ ਨੁਕਸਾਨ ਦੀ ਕੋਈ ਸੂਚਨਾ ਨਹੀਂ ਹੈ। ਇਹ ਘਟਨਾ ਸ਼ਨੀਵਾਰ ਰਾਤ ਝਾਰਖੰਡ ਦੀ ਰਾਜਧਾਨੀ ਰਾਂਚੀ ਤੋਂ ਕਰੀਬ 235 ਕਿਲੋਮੀਟਰ ਦੂਰ ਦੇਵਰੀ ਬਲਾਕ ’ਚ ਵਾਪਰੀ। ਡੁਮਰੀਟੋਲਾ ਅਤੇ ਕਰੀਪਹਾਰੀ ਪਿੰਡਾਂ ਨੂੰ ਜੋੜਨ ਲਈ ਫਤਿਹਪੁਰ-ਭੇਲਾਵਤੀ ਸੜਕ ’ਤੇ ਪੁਲ ਬਣਾਇਆ ਜਾ ਰਿਹਾ ਹੈ।ਗਿਰੀਡੀਹ ਦੇ ਸੜਕ ਨਿਰਮਾਣ ਵਿਭਾਗ ਦੇ ਕਾਰਜਕਾਰੀ ਇੰਜੀਨੀਅਰ ਵਿਨੇ ਕੁਮਾਰ ਨੇ ਕਿਹਾ, ’ਪੁਲ ਦਾ ਨਿਰਮਾਣ ਚੱਲ ਰਿਹਾ ਹੈ। ਸ਼ਨੀਵਾਰ ਰਾਤ ਨੂੰ ਹੋਈ ਭਾਰੀ ਬਰਸਾਤ ਕਾਰਨ ਪੁਲ ਦਾ ਗਾਰਡਰ ਟੁੱਟ ਗਿਆ, ਜਿਸ ਕਾਰਨ ਇੱਕ ਪਿੱਲਰ ਝੁਕ ਗਿਆ। ਠੇਕੇਦਾਰ ਨੂੰ ਇਸ ਹਿੱਸੇ ਨੂੰ ਦੁਬਾਰਾ ਬਣਾਉਣ ਲਈ ਕਿਹਾ ਗਿਆ ਹੈ। ਹਾਲਾਂਕਿ ਉਨ੍ਹਾਂ ਨੇ ਪੁਲ ਦੀ ਲਾਗਤ ਦਾ ਖੁਲਾਸਾ ਨਹੀਂ ਕੀਤਾ।
ਸੂਤਰਾਂ ਨੇ ਦੱਸਿਆ ਕਿ ਇਸ ਪੁਲ ਦਾ ਨਿਰਮਾਣ ਕਰੀਬ 5 ਕਰੋੜ ਰੁਪਏ ਦੀ ਲਾਗਤ ਨਾਲ ਕੀਤਾ ਜਾ ਰਿਹਾ ਹੈ। ਇਹ ਝਾਰਖੰਡ ਦੇ ਗਿਰੀਡੀਹ ਅਤੇ ਬਿਹਾਰ ਦੇ ਜਮੁਈ ਜ਼ਿਲ੍ਹੇ ਦੇ ਦੂਰ-ਦੁਰਾਡੇ ਦੇ ਪਿੰਡਾਂ ਨੂੰ ਜੋੜੇਗਾ। ਇਕ ਹੋਰ ਇੰਜੀਨੀਅਰ ਨੇ ਦੱਸਿਆ ਕਿ ਗਾਰਡਰ ’ਤੇ ਸ਼ਟਰਿੰਗ ਦਾ ਕੰਮ ਇਕ ਹਫਤਾ ਪਹਿਲਾਂ ਹੋਇਆ ਸੀ ਅਤੇ ਇਸ ਨੂੰ ਮਜ਼ਬੂਤ ਕਰਨ ਲਈ ਘੱਟੋ-ਘੱਟ 28 ਦਿਨ ਲੱਗ ਗਏ ਸਨ।ਬਿਹਾਰ ’ਚ ਪੁਲ ਡਿੱਗਣ ਦੀਆਂ ਘਟਨਾਵਾਂ ਲਗਾਤਾਰ ਵਾਪਰ ਰਹੀਆਂ ਹਨ। ਪਿਛਲੇ 10-15 ਦਿਨਾਂ ’ਚ ਬਿਹਾਰ ’ਚ ਪੰਜਵਾਂ ਪੁਲ ਢਹਿ ਗਿਆ ਸੀ। ਤਾਜ਼ਾ ਮਾਮਲਾ ਮਧੂਬਨੀ ਜ਼ਿਲੇ ਦੇ ਮਧੇਪੁਰ ਬਲਾਕ ਦੇ ਭਾਗਾ ਕੋਸ਼ੀ ਡੈਮ ਚੌਕ ਨੇੜੇ ਲਾਲਵਾੜੀ ਤੋਂ ਮਹਾਪਾਤੀਆ ਮੁੱਖ ਸੜਕ ਤੱਕ ਦਾ ਹੈ। ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਗਾਰਡਰ ਲਈ ਸ਼ਟਰਿੰਗ ਦਾ ਕੰਮ ਚੱਲ ਰਿਹਾ ਹੈ। ਫਿਰ ਭੂਤਹੀ ਬਾਲਣ ਨਦੀ ’ਚ ਪਾਣੀ ਦਾ ਪੱਧਰ ਅਚਾਨਕ ਵੱਧ ਗਿਆ ਜਿਸ ਕਾਰਨ ਪਾਣੀ ਦੇ ਤੇਜ਼ ਵਹਾਅ ’ਚ ਗਾਰਡਰ ਵਹਿ ਗਿਆ। ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਜਦੋਂ ਗਾਰਡਰ ਡਿੱਗਿਆ ਤਾਂ ਲੋਕਾਂ ਨੇ ਸਮਝਿਆ ਕਿ ਪੁਲ ਟੁੱਟ ਗਿਆ ਹੈ।