ਬਾਲ ਕਵਿਤਾ
ਦੇਖੋ ਸੂਰਜ ਨਿਕਲ ਆਇਆ
ਰਾਤ ਗਈ ਹੈ ਚਾਨਣ ਆਇਆ
ਚਾਨਣ ਦੇ ਨਾਲ ਦਿਨ ਰੁਸ਼ਨਾਇਆ
ਦੇਖੋ ਸੂਰਜ ਨਿਕਲ ਆਇਆ
ਦੇਖੋ ਸੂਰਜ ਨਿਕਲ ਆਇਆ
ਗਰਮ ਗਰਮ ਤੇ ਗੋਲ -ਗੋਲ ਹੈ
ਚਿੱਟੀ ਚਾਦਰ ਲੈ ਕੇ ਆਇਆ
ਦੇਖੋ ਸੂਰਜ ਨਿਕਲ ਆਇਆ
ਦੇਖੋ ਸੂਰਜ ਨਿਕਲ ਆਇਆ
ਫੁੱਲਾਂ ਉੱਤੇ ਤਿਤਲੀਆਂ ਬੈਠਣ
ਭੌਰਿਆਂ ਨੇ ਹੈ ਗੀਤ ਸੁਣਾਇਆ
ਦੇਖੋ ਸੂਰਜ ਨਿਕਲ ਆਇਆ
ਦੇਖੋ ਸੂਰਜ ਨਿਕਲ ਆਇਆ
ਚਿੜੀਆਂ ਨੇ ਹੈ ਚੀਂ ਚੀਂ ਲਾਈ
ਕਾਵਾਂ ਨੇ ਹੈ ਸ਼ੋਰ ਮਚਾਇਆ
ਦੇਖੋ ਸੂਰਜ ਨਿਕਲ ਆਇਆ
ਦੇਖੋ ਸੂਰਜ ਨਿਕਲ ਆਇਆ
ਉੱਠੋ ਬੱਚਿਓ ਚੱਲੋ ਸਕੂਲੇ
ਸੰਦੇਸ਼ਾਂ ਇਹ ਦੇਵਣ ਆਇਆ
ਦੇਖੋ ਸੂਰਜ ਨਿਕਲ ਆਇਆ
ਦੇਖੋ ਸੂਰਜ ਨਿਕਲ ਆਇਆ
———————00000———————
ਕਵਿਤਾ – ਮੈਂ ਕੰਮੀਆਂ ਦੀ ਜਾਈ
ਮੈਂ ਕੰਮੀਆਂ ਦੀ ਜਾਈ ਵੇ ਲੋਕਾ, ਮੈਂ …
ਗਰਮੀ ਵਿੱਚ ਨਾ ਪੱਖਾ ਜੁੜਦਾ
ਸਿਆਲੀਂ ਨਾ ਲੇਫ-ਤਲਾਈ
ਵੇ ਲੋਕਾ ਮੈਂ ਕੰਮੀਆਂ ਦੀ ਜਾਈ …
ਖੇਤੀਂ ਜਾਵਾਂ ਕੱਖ-ਪੱਠੇ ਨੂੰ
ਸਰਦਾਰ ਨੇ ਨਿਗਾ ਟਿਕਾਈ
ਵੇ ਲੋਕਾ ਮੈਂ ਕੰਮੀਆਂ ਦੀ ਜਾਈ…
ਪਾਟੀ ਕੁੜਤੀ ਢਾਕਾਂ ਨੰਗੀਆਂ
ਬਾਬੇ ਬੁੱਲੀਂ ਜੀਭ ਘੁੰਮਾਈ
ਵੇ ਲੋਕਾ ਮੈਂ ਕੰਮੀਆਂ ਦੀ ਜਾਈ …
ਗੋਹਾ-ਕੂੜਾ ਕਰਦੀ ਸ਼ਾਹਣੀ ਦਾ
ਮੈਂ ਜਾਤ-ਕਜਾਤ ਪਰਖਾਈ
ਵੇ ਲੋਕਾ ਮੈਂ ਕੰਮੀਆਂ ਦੀ ਜਾਈ …
ਪੱਕੀ ਚਾਹ ਵਾਲੀ ਵਾਟੀ ਮੇਰੀ
ਮੂਧੀ ਕੌਲੇ ਨਾਲ ਟਿਕਾਈ
ਵੇ ਲੋਕਾ ਮੈਂ ਕੰਮੀਆਂ ਦੀ ਜਾਈ …
ਜੋਬਨ ਰੁਤੇ … ਮੌਲਣ ਰੁੱਤੇ …
ਝਾਟੇ ਚਿੱਟਿਆਂ ਨੇ ਛੈਂਬਰ ਲਾਈ
ਵੇ ਲੋਕਾ ਮੈਂ ਕੰਮੀਆਂ ਦੀ ਜਾਈ …
ਬਾਬਲ ਦੱਸ ਕਿੰਝ ਕਾਜ ਰਚਾਏ
ਜਿੰਦ ਡਾਹਡਿਆਂ ਲੇਖੇ ਲਾਈ
ਵੇ ਲੋਕਾ ਮੈਂ ਕੰਮੀਆਂ ਦੀ ਜਾਈ …
ਬਚਪਨ ਰੁਲਿਆ ਭੁੱਖਣ–ਭਾਣਾਂ
ਨਾ ਹੀ ਕਦੇ ਜਾਵਾਨੀ ਆਈ
ਵੇ ਲੋਕਾ ਮੈਂ ਕੰਮੀਆਂ ਦੀ ਜਾਈ …
ਵੱਟੀਂ ਰੁਲ ਗਏ ਚਾਅ ਵਿਗੁੱਚੇ
ਨਾ ਹੀ ਰੱਜ ਕੇ ਜੂਨ ਹੰਢਾਈ
ਵੇ ਲੋਕਾ ਮੈਂ ਕੰਮੀਆਂ ਦੀ ਜਾਈ …
ਮਾਂ ਮੇਰੀ ਨੇ ਵਿੱਚ ਚਿੰਤਾਵਾਂ
ਆਪਣੀ ਜਾਨ ਗਵਾਈ
ਵੇ ਲੋਕਾ ਮੈਂ ਕੰਮੀਆਂ ਦੀ ਜਾਈ …
ਨੀਚ ਜੇ ਤਿਆਗ ਈ ਦੇਵੋ
ਬਣ ਜਾਈਏ ਭਾਈ–ਭਾਈ
ਵੇ ਲੋਕਾ ਮੈਂ ਕੰਮੀਆਂ ਦੀ ਜਾਈ …
———————00000———————
ਕਵਿਤਾ – ਮਨ ਦੀਆਂ ਲੀਰਾਂ
ਮਨ ਦੀਆਂ ਲੀਰਾਂ
ਤਨ ਦੇ ਲੋਥੜ
ਮੈਂ
ਨਿੱਤ ਨਿੱਤ
ਭੇਂਟ ਚੜਾਉਨੀ ਆਂ
ਮੇਰੇ ਤਨ ਦੇ ਹਜਾਰਾਂ ਸੁਆਮੀ
ਰਾਜੇ
ਵਜੀਰ
ਨੇਤਾ
ਅਮੀਰ
ਗਰੀਬ
ਸ਼ਾਹ
ਮਜਦੂਰ
ਜਿਨ੍ਹਾ ਨੂੰ ਮੈਂ ਦਿਨ-ਰਾਤ ਭੁਗਤਾਉਨੀ ਆਂ
ਦੇਖੋ …
ਫਿਰ ਵੀ ਮੈਂ ਰੰਡੀ ਅਖਵਾਉਨੀ ਆਂ
———————00000———————