ਨਵੀਂ ਦਿੱਲੀ – ਸਾਬਕਾ ਕੇਂਦਰੀ ਮੰਤਰੀ ਤੇ ਕਾਂਗਰਸ ਦੇ ਸੀਨੀਅਰ ਨੇਤਾ ਆਨੰਦ ਸ਼ਰਮਾ ਨੇ ਕਿਹਾ ਕਿ G-23 (ਪਾਰਟੀ ਤੋਂ ਨਰਾਜ਼ ਨੇਤਾਵਾਂ ਦੇ ਗਰੁੱਪ) ਕਾਂਗਰਸ ਪਾਰਟੀ ਦੇ ਦਿਲ ਵਿਚ ਹੈ ਅਤੇ ਇਸ ਨੂੰ ਮਜ਼ਬੂਤ ਕਰਨ ਲਈ ਕੰਮ ਕਰ ਰਿਹਾ ਹੈ। ਆਨੰਦ ਸ਼ਰਮਾ ਨੇ ਸ਼ਿਮਲਾ ਵਿੱਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਜੀ-23 ਕੋਈ ਵੱਖਰਾ ਗਰੁੱਪ ਨਹੀਂ ਹੈ।
ਕਾਂਗਰਸ ਨੇਤਾ ਆਨੰਦ ਸ਼ਰਮਾ ਨੇ ਕਿਹਾ, ”ਅਸੀਂ ਕਦੇ ਵੀ ਅਜਿਹਾ ਕੋਈ ਗਰੁੱਪ ਨਹੀਂ ਬਣਾਇਆ ਅਤੇ ਨਾ ਹੀ ਕੋਈ ਨਾਂ ਦਿੱਤਾ ਹੈ। ਜਿਵੇਂ ਕਿ ਅਸੀਂ ਪਾਰਟੀ ਨੂੰ ਮਜ਼ਬੂਤ ਕਰਨ ਲਈ ਸੁਧਾਰਾਂ ਦੀ ਗੱਲ ਕਰ ਰਹੇ ਹਾਂ, ਇਸ ਵਿੱਚ ਗ਼ਲਤ ਕੀ ਹੈ। ਅਸੀਂ ਜੋ ਵੀ ਕਿਹਾ ਹੈ ਉਹ ਕਾਂਗਰਸ ਪ੍ਰਧਾਨ ਕੋਲ ਹੈ। ਕੁਝ ਮੁੱਦੇ ਹੱਲ ਹੋ ਗਏ ਹਨ ਅਤੇ ਮੈਨੂੰ ਉਮੀਦ ਹੈ ਕਿ ਆਉਣ ਵਾਲੇ ਦਿਨਾਂ ਵਿੱਚ ਹੋਰ ਬਹੁਤ ਸਾਰੇ ਹੱਲ ਹੋ ਜਾਣਗੇ।
ਪਾਰਟੀ ਵਿੱਚ ਸੁਧਾਰਾਂ ਦੀ ਗੱਲ ਕਰਨ ਵਿੱਚ ਕੀ ਗ਼ਲਤ ਹੈ? ਅਸੀਂ ਕਾਂਗਰਸ ਪਾਰਟੀ ਦਾ ਅਨਿੱਖੜਵਾਂ ਅੰਗ ਹਾਂ, ਸਾਡੇ ਵਿੱਚੋਂ ਬਹੁਤ ਸਾਰੇ ਸੀਡਬਲਊਸੀ ਦੇ ਮੈਂਬਰ ਹਨ। ਸਾਡੇ ਵਿੱਚੋਂ ਕੁਝ ਸਿਆਸੀ ਮਾਮਲਿਆਂ ਦੀ ਕਮੇਟੀ ਵਿੱਚ ਹਨ। ਜੋਧਪੁਰ ਤੋਂ ਬਾਅਦ ਬਣੀ ਟਾਸਕ ਫੋਰਸ ਵਿੱਚ ਮੈਂ ਅਤੇ ਗੁਲਾਮ ਨਬੀ ਆਜ਼ਾਦ ਵੀ ਸ਼ਾਮਲ ਹੋਏ ਹਾਂ। ਇਸ ਦੇ ਨਾਲ ਹੀ ਉਨ੍ਹਾਂ ਕਿਹਾ ਕਿ ਕਾਂਗਰਸ ਨੂੰ ਵਾਪਸ ਆਪਣੀ ਸਿਆਸੀ ਸਥਿਤੀ ਮੁੜ ਹਾਸਲ ਕਰਨੀ ਚਾਹੀਦੀ ਹੈ।
ਆਨੰਦ ਸ਼ਰਮਾ ਨੇ ਕਿਹਾ ਕਿ ਇਹ ਸਾਡੀ ਸਮੂਹਿਕ ਚਿੰਤਾ ਹੈ ਕਿ ਜਿਸ ਪਾਰਟੀ ਨੇ ਭਾਰਤੀ ਰਾਜਨੀਤਿਕ ਖੇਤਰ ‘ਤੇ ਦਬਦਬਾ ਬਣਾਇਆ ਹੈ, ਉਹ ਹੁਣ ਕਈ ਮਹੱਤਵਪੂਰਨ ਸੂਬਿਆਂ ‘ਚ ਹਾਰ ਚੁੱਕੀ ਹੈ। ਸਾਨੂੰ ਲੋੜ ਅਨੁਸਾਰ ਲੋਕਤੰਤਰ ਵੱਲ ਮੁੜਨਾ ਚਾਹੀਦਾ ਹੈ। ਸਾਨੂੰ ਮਜ਼ਬੂਤ ਪ੍ਰਾਇਮਰੀ ਅਤੇ ਬਲਾਕ ਕਮੇਟੀਆਂ ਦੀ ਲੋੜ ਹੈ ਅਤੇ ਮਜ਼ਬੂਤਜ਼ਿਲ੍ਹਾ ਕਮੇਟੀਆਂ ਦੀ ਵੀ ਲੋੜ ਹੈ। ਪ੍ਰਦੇਸ਼ ਕਾਂਗਰਸ ਕਮੇਟੀ ਪ੍ਰਤੀ ਜਵਾਬਦੇਹ ਬਣਨਾ ਸਾਡਾ ਫ਼ਰਜ਼ ਬਣਦਾ ਹੈ ਕਿ ਅਸੀਂ ਪਾਰਟੀ ਨੂੰ ਮਜ਼ਬੂਤ ਕਰਨ ਲਈ ਕੰਮ ਕਰੀਏ। ਉਨ੍ਹਾਂ ਕਿਹਾ ਕਿ ਸੂਬੇ ਵਿੱਚ ਭਾਜਪਾ ਸਰਕਾਰ ਖ਼ਿਲਾਫ਼ ਸੱਤਾ ਵਿਰੋਧੀ ਲਹਿਰ ਹੈ।
ਸ਼ਰਮਾ ਨੇ ਅੱਗੇ ਕਿਹਾ ਕਿ ਕਾਂਗਰਸ ਪਾਰਟੀ ਹਿਮਾਚਲ ਪ੍ਰਦੇਸ਼ ਦੀਆਂ ਚੋਣਾਂ ਨੂੰ ਗੰਭੀਰਤਾ ਨਾਲ ਲੈ ਰਹੀ ਹੈ। ਜੇਕਰ ਅਸੀਂ ਉਮੀਦਵਾਰਾਂ ਦੀ ਚੋਣ ਪ੍ਰਕਿਰਿਆ ਵਿੱਚ ਪਾਰਟੀ ਦੇ ਰਵਾਇਤੀ ਢੰਗ ਨੂੰ ਅਪਣਾਉਂਦੇ ਹਾਂ ਤਾਂ ਕਾਂਗਰਸ ਇੱਥੇ ਚੋਣਾਂ ਵਿੱਚ ਜ਼ਬਰਦਸਤ ਲੜਾਈ ਲੜੇਗੀ। ਸੂਬੇ ‘ਚ ਭਾਜਪਾ ਖ਼ਿਲਾਫ਼ ਸੱਤਾ ਵਿਰੋਧੀ ਲਹਿਰ ਹੈ। ਉਨ੍ਹਾਂ ਕਿਹਾ ਕਿ ਅਸੀਂ ਇਕਜੁੱਟ ਹੋ ਕੇ ਲੜ ਰਹੇ ਹਾਂ ਅਤੇ ਇਸ ਦਾ ਫਾਇਦਾ ਲਵਾਂਗੇ । ਸ਼ਰਮਾ ਨੇ ਕਿਹਾ ਕਿ ਉਮੀਦਵਾਰਾਂ ਦੀ ਚੋਣ ਵਿੱਚ ਸਾਫ਼-ਸੁਥਰਾ ਅਕਸ, ਜਿੱਤਣ ਦੀ ਯੋਗਤਾ ਅਤੇ ਸਵੀਕ੍ਰਿਤੀ ਦੇ ਮਾਪਦੰਡ ਹੋਣੇ ਚਾਹੀਦੇ ਹਨ।
ਜ਼ਿਕਰਯੋਗ ਹੈ ਕਿ ਹਿਮਾਚਲ ਪ੍ਰਦੇਸ਼ ਵਿੱਚ ਇਸ ਸਾਲ ਦੇ ਅੰਤ ਵਿੱਚ ਵਿਧਾਨ ਸਭਾ ਚੋਣਾਂ ਹੋਣੀਆਂ ਹਨ।
ਆਨੰਦ ਸ਼ਰਮਾ ਬੋਲੇ, G-23 ਕਾਂਗਰਸ ਨੂੰ ਮਜਬੂਤ ਕਰਨ ਲਈ ਕੰਮ ਕਰ ਰਿਹੈ, ਸੁਧਾਰ ਦੀ ਗੱਲ ਕਰਨ ‘ਚ ਗ਼ਲਤ ਕੀ ਹੈ
