ਮੈਲਬੌਰਨ – ਅੱਠ ਸਾਲ ਤੋਂ ਵੱਧ ਉਮਰ ਦੇ ਵਿਦਿਆਰਥੀਆਂ ਨੂੰ ਕਲਾਸ ਵਿੱਚ ਮਾਸਕ ਪਹਿਨਣ ਲਈ ਕਿਹਾ ਗਿਆ ਹੈ ਕਿਉਂਕਿ ਵਿਕਟੋਰੀਆ ਵਿੱਚ ਕੋਵਿਡ-19 ਦੇ ਕੇਸਾਂ ਦੀ ਰੋਜ਼ਾਨਾ ਗਿਣਤੀ ਇੱਕ ਵਾਰ ਫਿਰ 10,000 ਦੇ ਕਰੀਬ ਪਹੁੰਚ ਗਈ ਹੈ।
ਵਿਕਟੋਰੀਅਨ ਪਬਲਿਕ, ਸੁਤੰਤਰ ਅਤੇ ਕੈਥੋਲਿਕ ਸਕੂਲਾਂ ਦੀ ਨੁਮਾਇੰਦਗੀ ਕਰਨ ਵਾਲੀਆਂ ਸੰਸਥਾਵਾਂ ਦੇ ਵਲੋਂ ਮਾਪਿਆਂ ਨੂੰ ਇੱਕ ਸਾਂਝੇ ਪੱਤਰ ਵਿੱਚ ਅੱਠ ਸਾਲ ਅਤੇ ਇਸ ਤੋਂ ਵੱਧ ਉਮਰ ਦੇ ਸਕੂਲੀ ਵਿਦਿਆਰਥੀਆਂ ਨੂੰ ਕਲਾਸ ਵਿੱਚ ਮਾਸਕ ਪਹਿਨਣ ਲਈ ਕਿਹਾ ਗਿਆ ਹੈ। ਜਦੋਂ ਕਿ ਸਕੂਲਾਂ ਵਿੱਚ ਮਾਸਕ ਪਹਿਨਣਾ ਸਰਕਾਰ ਦੁਆਰਾ ਲਾਜ਼ਮੀ ਨਹੀਂ ਕੀਤਾ ਜਾ ਰਿਹਾ ਹੈ, ਸਿੱਖਿਆ ਵਿਭਾਗ, ਸੁਤੰਤਰ ਸਕੂਲ ਵਿਕਟੋਰੀਆ ਅਤੇ ਕੈਥੋਲਿਕ ਸਿੱਖਿਆ ਕਮਿਸ਼ਨ ਆਫ਼ ਵਿਕਟੋਰੀਆ ਦੇ ਪੱਤਰ ਵਿੱਚ ਇਹ ਨਹੀਂ ਕਿਹਾ ਗਿਆ ਹੈ ਕਿ ਮਾਸਕ ਪਹਿਨਣਾ ਵਿਕਲਪਿਕ ਰਹੇਗਾ। ਪੱਤਰ ਵਿੱਚ ਲਿਖਿਆ ਗਿਆ ਹੈ, “ਅਸੀਂ 8 ਸਾਲ ਅਤੇ ਇਸ ਤੋਂ ਵੱਧ ਉਮਰ ਦੇ ਸਾਰੇ ਵਿਦਿਆਰਥੀਆਂ ਅਤੇ ਵਿਕਟੋਰੀਆ ਦੇ ਸਾਰੇ ਸਕੂਲਾਂ ਦੇ ਸਾਰੇ ਸਟਾਫ ਨੂੰ ਹੁਣ ਤੋਂ ਸਰਦੀਆਂ ਦੇ ਅੰਤ ਤੱਕ ਕਲਾਸ ਵਿੱਚ (ਸਪੱਸ਼ਟ ਸੰਚਾਰ ਲਈ ਮਾਸਕ ਹਟਾਉਣਾ ਜ਼ਰੂਰੀ ਹੋਣ ਨੂੰ ਛੱਡ ਕੇ) ਮਾਸਕ ਪਹਿਨਣ ਲਈ ਕਹਿ ਰਹੇ ਹਾਂ। ਵਿਦਿਆਰਥੀਆਂ ਨੂੰ ਬਾਹਰ ਮਾਸਕ ਪਹਿਨਣ ਦੀ ਲੋੜ ਨਹੀਂ ਹੋਵੇਗੀ ਅਤੇ ਸਕੂਲ ਦੀਆਂ ਗਤੀਵਿਧੀਆਂ ਜਿਵੇਂ ਕਿ ਖੇਡਾਂ, ਸੰਗੀਤ ਅਤੇ ਪ੍ਰਦਰਸ਼ਨ ਜਾਰੀ ਰਹਿਣਗੇ। ਸਮੂਹ ਬੱਚਿਆਂ ਨੂੰ ਜਨਤਕ ਆਵਾਜਾਈ ‘ਤੇ ਮਾਸਕ ਪਹਿਨਣ ਲਈ ਵੀ ਕਹਿ ਰਿਹਾ ਹੈ।
ਵਿਕਟੋਰੀਅਨ ਸਰਕਾਰ ਨੇ ਕਿਹਾ ਹੈ ਕਿ ਇਹ ਬੇਨਤੀ ਸਿੱਖਿਆ ਪ੍ਰਣਾਲੀ ਵਿੱਚ ਮਾਸਕ ਬਾਰੇ ਨੀਤੀ ਵਿੱਚ ਤਬਦੀਲੀ ਦਾ ਸੰਕੇਤ ਨਹੀਂ ਦਿੰਦੀ। ਸਿੱਖਿਆ ਮੰਤਰੀ ਨੈਟਲੀ ਹਚਿਨਜ਼ ਨੇ ਕਿਹਾ ਹੈ ਕਿ, “ਮਾਸਕ ਸਬੰਧੀ ਇਸ ਬੇਨਤੀ ਬਾਰੇ ਵਿਆਪਕ ਸਿੱਖਿਆ ਖੇਤਰ ਨਾਲ ਸਲਾਹ ਕੀਤੀ ਗਈ ਸੀ। ਅਸੀਂ ਜੋ ਕਰ ਰਹੇ ਹਾਂ ਉਹ ਸਿਹਤ ਮੰਤਰੀ ਦੀ ਤਾਜ਼ਾ ਸਲਾਹ ਦੇ ਅਨੁਸਾਰ ਕਰ ਰਹੇ ਹਾਂ। ਅਸੀਂ ਇਹ ਸੁਨਿਸ਼ਚਿਤ ਕਰ ਰਹੇ ਹਾਂ ਕਿ ਅਸੀਂ ਮੌਜੂਦਾ ਮਾਹੌਲ ਵਿੱਚ ਸਕੂਲਾਂ ਨੂੰ ਜਿੰਨਾ ਸੰਭਵ ਹੋ ਸਕੇ ਸੁਰੱਖਿਅਤ ਬਣਾਉਣ ਲਈ ਉਹ ਸਭ ਕੁੱਝ ਕਰ ਰਹੇ ਹਾਂ।”
ਮਾਸਕ ਦੇ ਆਦੇਸ਼ਾਂ ਬਾਰੇ ਇੱਕ ਵਾਰ ਫਿਰ ਬਹਿਸ ਸ਼ੁਰੂ ਹੋ ਗਈ ਹੈ ਕਿਉਂਕਿ ਸਿਹਤ ਮਾਹਰ ਚੇਤਾਵਨੀ ਦਿੰਦੇ ਹਨ ਕਿ ਕੋਵਿਡ-19 ਸਬੰਧੀ ਲਾਪ੍ਰਵਾਹਗੀ ਸਭ ਤੋਂ ਕਮਜ਼ੋਰ ਆਸਟ੍ਰੇਲੀਅਨਾਂ ਨੂੰ ਮਹਿੰਗੀ ਪੈ ਰਹੀ ਹੈ। ਮਾਸਕ ਦੀ ਬੇਨਤੀ ਉਸ ਸਮੇਂ ਆਈ ਹੈ ਜਦੋਂ ਵਿਕਟੋਰੀਆ ਓਮਿਕਰੋਨ ਕੇਸਾਂ ਦੀ ਵੱਧ ਰਹੀ ਗਿਣਤੀ ਦੇ ਕਾਰਨ ਰਾਜ ਦੀਆਂ ਸਿਹਤ ਸੇਵਾਵਾਂ ‘ਤੇ ਦਬਾਅ ਵੱਧਦਾ ਜਾ ਰਿਹਾ ਹੈ। ਅੱਜ ਰਾਜ ਵਿੱਚ 12,201 ਨਵੇਂ ਕੋਵਿਡ-19 ਕੇਸ ਅਤੇ ਇਸ ਨਾਲ 25 ਮੌਤਾਂ ਹੋਈਆਂ ਹਨ। ਇੱਥੇ 897 ਲੋਕ ਕੋਵਿਡ-19 ਦੇ ਨਾਲ ਹਸਪਤਾਲ ਵਿੱਚ ਦਾਖਲ ਹਨ, ਜਿਨ੍ਹਾਂ ਵਿੱਚ 34 ਆਈਸੀਯੂ ਦੇ ਵਿੱਚ ਹਨ।
ਵਿਕਟੋਰੀਆ ਦੇ ਸਿਹਤ ਵਿਭਾਗ ਨੇ ਕਿਹਾ ਹੈ ਕਿ 22 ਜੂਨ ਤੋਂ ਵਿਕਟੋਰੀਆ ਦੇ ਵਿੱਚ ਕੋਵਿਡ-19 ਵਾਲੇ ਮਰੀਜ਼ਾਂ ਦਾ ਹਸਪਤਾਲ ਵਿੱਚ 99 ਫੀਸਦੀ ਵਾਧਾ ਹੋਇਆ ਹੈ। ਇਸ ਸਮੇਂ ਦੌਰਾਨ ਹੀ ਕੋਵਿਡ-19 ਦੇ ਕਾਰਨ ਆਈਸੀਯੂ ਦੇ ਵਿੱਚ ਦਾਖਲ ਹੋਣ ਵਾਲਿਆਂ ਦੇ ਵਿੱਚ 60 ਪ੍ਰਤੀਸ਼ਤ ਦਾ ਵਾਧਾ ਹੋਇਆ ਹੈ ਅਤੇ ਸਿਹਤ ਸੰਭਾਲ ਕਰਮਚਾਰੀਆਂ ਦੀ ਛੁੱਟੀ ਵਿੱਚ 47 ਪ੍ਰਤੀਸ਼ਤ ਵਾਧਾ ਹੋਇਆ ਹੈ। ਇਹ ਉਮੀਦ ਕੀਤੀ ਜਾਂਦੀ ਹੈ ਕਿ ਅਗਸਤ ਵਿੱਚ ਓਮਿਕਰੋਨ ਕੇਸਾਂ ਦੀ ਤੀਜੀ ਲਹਿਰ ਸਿਖਰ ‘ਤੇ ਹੋਵੇਗੀ। ਕੱਲ੍ਹ ਵਿਕਟੋਰੀਆ ਦੀ ਸਰਕਾਰ ਨੇ ਐਂਬੂਲੈਂਸਾਂ ਅਤੇ ਹਸਪਤਾਲਾਂ, ਜੋ ਕਿ ਵਧ ਰਹੇ ਤਣਾਅ ਵਿੱਚ ਹਨ, ਦੇ ਵਿੱਚ ਮਰੀਜ਼ਾ ਦੀ ਗਿਣਤੀ ਨੂੰ ਘੱਟ ਕਰਨ ਲਈ ਇੱਕ ਵਰਚੁਅਲ ਐਮਰਜੈਂਸੀ ਵਿਭਾਗ ਪ੍ਰੋਗਰਾਮ ਦੇ ਵਿਸਤਾਰ ਦਾ ਐਲਾਨ ਵੀ ਕੀਤਾ ਹੈ। ਵਿਕਟੋਰੀਅਨ ਵਰਚੁਅਲ ਐਮਰਜੈਂਸੀ ਵਿਭਾਗ ਅਕਤੂਬਰ 2020 ਵਿੱਚ ਨਾਰਦਰਨ ਹਸਪਤਾਲ ਵਿੱਚ ਸਥਾਪਤ ਕੀਤਾ ਗਿਆ ਸੀ। ਇਹ ਮਰੀਜ਼ਾਂ ਨੂੰ ਐਂਬੂਲੈਂਸ ਰਾਹੀਂ ਹਸਪਤਾਲ ਲਿਜਾਏ ਬਿਨਾਂ ਡਾਕਟਰ ਜਾਂ ਨਰਸ ਨਾਲ ਸਲਾਹ-ਮਸ਼ਵਰਾ ਕਰਨ ਦੀ ਇਜਾਜ਼ਤ ਦਿੰਦਾ ਹੈ। ਇਹ ਪਹਿਲਾਂ ਹੀ 28,000 ਤੋਂ ਵੱਧ ਮਰੀਜ਼ਾਂ ਦਾ ਇਲਾਜ ਕਰ ਚੁੱਕਾ ਹੈ।
ਸੂਬੇ ਦੇ ਪ੍ਰੀਮੀਅਰ ਡੈਨੀਅਲ ਐਂਡਰਿਊਜ਼ ਨੇ ਕਿਹਾ ਕਿ, “ਇਸ ਦੇ 71 ਪ੍ਰਤੀਸ਼ਤ ਮਰੀਜ਼ ਵੀਡੀਓ ਕਾਨਫਰੰਸ ਰਾਹੀਂ ਸਲਾਹ ਅਤੇ ਨਿਰਦੇਸ਼ ਪ੍ਰਾਪਤ ਕਰਨ ਤੋਂ ਬਾਅਦ ਹਸਪਤਾਲ ਜਾਣ ਤੋਂ ਪਰਹੇਜ਼ ਕਰਦੇ ਹਨ। ਇਸਦਾ ਮਤਲਬ ਹੈ ਕਿ ਇਸ ਨਾਲ ਘੱਟ ਯਾਤਰਾਵਾਂ, ਘੱਟ ਆਵਾਜਾਈ, ਅਗਲੀ ਟ੍ਰਿਪਲ-0 ਐਮਰਜੈਂਸੀ ਜਾਂ ਅਗਲੀ ਲਾਈਟਾਂ-ਅਤੇ-ਸਾਈਰਨ ਐਮਰਜੈਂਸੀ ਵਿੱਚ ਹਾਜ਼ਰ ਹੋਣ ਲਈ ਵਧੇਰੇ ਐਂਬੂਲੈਂਸਾਂ ਨੂੰ ਖਾਲੀ ਕੀਤਾ ਗਿਆ ਹੈ।”